Af vellinum er stórfenglegt útsýni yfir náttúrufegurð eyjunnar La Gomera, yfir Atlantshafið og El Teide. Það sem heillar golfspilarana þó mest er landslagið sem þeir spila í en landslag Tecina-golfvallarins á sér ekki hliðstæðu.
Kylfingar sem kjósa að ganga völlinn eru keyrðir upp á fyrsta teig þar sem kerrurnar bíða eftir þeim. Þeir sem spila á golfbíl keyra sjálfir upp á fyrsta teig. Við fyrsta teiginn er púttflöt og lítill golfskáli og er útsýnið þaðan stórkostlegt. Hæðarmunurinn á milli fyrsta teigs sem er hæsti punktur vallarins og 18. flatar sem er lægsti punkturinn er 175 metrar. Brautirnar eru leiknar þvert á hlíðina og niður í móti svo kylfingar njóta sjávarsýnar af hverri braut vallarins. Það er nokkuð sem fáir golfvellir í heiminum geta státað af. Við einstaka hönnun þessa heimsklassagolfvallar var tekið með í reikninginn að flestir kylfingar eru ferðamenn sem vilja njóta golfleiksins í góðu umhverfi og notalegum félagsskap. Því hafa svæðin í kringum brautirnar verið hönnuð þannig að þau séu þægileg og er mikið pláss í kringum flatirnar. Þrátt fyrir það reynir á betri kylfinga að spila staðsetningargolf og að setja höggin réttu megin á brautir og flatir til að ná sem bestu skori. Margar brautirnar eru það eftirminnilegar að þær festast í minni kylfinganna sem bestu og fallegustu golfbrautir sem þeir hafa leikið.